Големиот градски парк во Струмица вечерва ќе биде домаќин на големата Get EXITed забава, која почнува во 20:00 часот, а влезот за посетителите е бесплатен. Настанот ќе понуди целосна вечерна програма со познати имиња од домашната, регионалната и светската сцена.
Вратите на паркот се отвораат во 19:15 часот, а прва на сцената ќе настапи Александра Јанева од 20:00. Во 21:30 ќе свири легендарниот бенд Бајага и Инструктори, додека во 23:00 следува настапот на актуелната регионална сензација Бејби Лазања.
По полноќ, во 00:30, ќе се одржи настапот на светски познатиот ди-џеј и продуцент Џекс Џонс, а вечерта ќе заврши со сетот на БДМ од 02:00 часот.
Според најавите, посетителите ги очекува пријатна летна ноќ со идеални услови за концерт на отворено. Организатори на настанот се ЕГЗИТ тимот и Општина Струмица, кои најавуваат спектакуларна вечер со илјадници гости во Големиот градски парк.
