Инспириран од македонска, грчка и словенска митологија, македонска историја, легенди и фолклор, во Битола беше промовиран новиот епско-фантастичен роман, „Сонцето под земја, кралството над него” книга 1: „Неродениот и човекот кој не умре” на битолчанката Елена Бошбож.
Промотор на книгата беше м-р Маријана Котевска-Георгиева, извадоци читаше Бранислав Николов (Пијан Славеј), додека модератор на промоцијата беше проф. д-р Билјана Граматковски.
Дебитантскиот роман на Бошбож е првиот дел од епско-фантастичниот серијал „Сонцето под земја, кралството над него”
Кратка содржина на романот: Длабоко под земја лежи второто сонце, елша. Елшата е магична материја која со векови ги хранела Сончевите кралеви, давајќи им натприродна сила. Но не повеќе. Некои не ни веруваат дека некогаш тоа било вистина.
Сега поважно е пророштвото – пророштвото кое вели дека Сончевото кралство ќе згасне засекогаш. Неизбежноста на судбината ја засенува кралската фамилија. Затоа, принц Марко, Токиј Токмакот – џинот кој не е џин, Неда – главата на Зраците, и Ѕвездан – oвчарот од Поток, мораат да го најдат Неродениот од жена, да го уништат пред тој да збрише сè.
Но, на Сончевото кралство му се закануваат и други опасности. Стариот крал е решен да ги сече врските со господарот од подземјето, а Копачите, на чело со командантот Драгор, сејат раздор и ерес по срцата на народот. Браќа и сестри ќе посегнат по зло од завист, кој со оружје, кој со магија – сите барајќи си го своето.
Херои не можат да постојат, не во оваа земја. Oваа земја плаче за крв, а сонцето под земја ќе го нахрани победникот – некој ќе го отруе, некој ќе го зацари.
Елена Бошбож (31.10.1996) е писател, магистриран професор по англиски јазик и книжевност. Посетува фантастични светови кога ќе ѝ здодее овој вистинскиот. Кога не е дел од воспитно-образовниот процес, е пред лаптоп или пред книга, смислувајќи понекогаш волшебни, понекогаш морничави приказни.
Пишува и на македонски и на англиски. Нејзиниот прв краток расказ на англиски јазик е објавен во The Dark Corner Zine во 2020 година. Гостуваше и во поткастот Sublimely Gothic. Член е на Македонското научно друштво од 2022 година.
