Во последните години во светот се развива еногастрономскиот туризам како еден од најинтересните со кој што преку храна и алкохол на еден автентичен начин се презентира уникатноста на секое население.
Правилото што треба да го знаете е дека виното ја следи храната. Виното никогаш нема да влијае на вкусот на храната, но храната може негативно или позитивно да влијае на вкусот на виното. Токму тоа е причината за вистинскиот избор на виното со храната која се срвира, за да се постигне идеалниот баланс.
- Јајцата сами по себе тешко се комбинираат со вино. Но јајцата приготвени со некој добар сос, можат да постигнат успешен спој особено со белите вина како на пример одлежано шардоне.
- Кај тестенините виното треба да се усогласи со сосот со кој што се служат. На пример, шпагети со морски школки бараат суво и полесно бело вино, но доколку во сосот има павлака и печурки тој подобро ќе хармонизира со некое потполно бело вино.
- Рибата се комбинира со едноставни бели свежи вина.
- Сината риба – сардини, скуши, ослич, одат добро со неутрални бели, суви и свежи вина.
- Школките и морските плодови хармонизираат со вина од типот на шампањското.
- Исто така во замена може да се користат и суви вина без примеси на даб, односно вино кое што не чувано во дабово буре.
- Свинското исто така е приспособливо месо. Оди со широка лепеза црвени вина и средно бели вина. И тукa многу важен е сосот во кој се подготвува месото.
- Јагнешкото месо добро хармонизира со каберне совињон, со фини вина од типот на бордо. За ладно јагнешко изненадувачки добро одговараат бели вина. Во Македонија во последниве години се појавија неколку сериозни мерлоа, а кои одговараат со јагнешкото во разни форми.
- Говедското месо одлично се комбинира со многу црвени вина, но може и со посилно бело вино како шардоне, особено ако месото е подготвено на скара.
- Со добро телешко месо добро хармонизираат средно силни и нежни црвени вина. На пример нашите вина од сортата вранец може да бидат одлична надополна на добрите меса.
- За совршено да се спојат сирењето и виното при дегустација, за да го извлечеме максимумот од овој пар, од секој поединечно, потребно е да следиме неколку правила. Прво, треба зрелоста на виното да биде во хармонија со зрелоста на сирењето. Второ, треба да се совпадне интензитетот на нивните миризби и вкусови.
Основната цел на процесот на спарување вино со храна е да се пронајде вистинската комбинација од која ќе произлезе нов, трет, хармоничен вкус.
Автор: Ирина Јовановска,
студент по гастрономија
