Катерина Мавровска е фотографка од Битола која со фотоапаратот се дружи од своите млади години. Таа е голем вљубеник во природата, која е нејзина голема инспирација. Под наслов „Црно и бело е сè“ Катерина ја организира својата седма по ред самостојна изложба. Изложбата ќе биде отворена денес, 10 мај во 19 часот во Центарот за култура Битола. Ова беше повод за кратко запознавање со Катерина и нејзината пасија кон фотографијата.
Читај бе: Катерина, најнапред кажете ни, кога беше Вашиот прв контакт со апаратот?
-Прв пат во рака држев фото камера на мои седум години, всушност тоа беше едно минијатурно фото камерче и со него ги сликав кокичињата на Тумбе Кафе. Од петто до осмо одделение бев во фотосекција. На мои 15 години, татко ми ми подари професионален фотоапарат Практика и никогаш не се делев од него. После тоа и во средно бев во фотосекција и научив како се пресликува на бела хартија она што сме го виделе преку објективот.
Читај бе: Што беше пресудно да се вљубите во фотографијата?
-Јас пред се сум вљубеник во природата и од малечка бев развигорче, па извидник и планинар. Фото камерата ми служеше да донесам на некој начин дел од природата дома и да уживам во фотографиите на кои беше отсликано она што ме правеше среќна, некое цвеќенце, некој поток, рекичка или било што друго што мене ме исполнуваше. Така што, љубовта кон природата се претопи и во љубов кон фотографијата.
Читај бе: Што е она што најчесто може да се најде на Вашите фотографии? Каде ја пронаоѓате инспирацијата?
-На моите фотографии најчесто можете да го видите или залезот или изгревот на сонцето, обожавам драматично небо со бурни облаци, водопади, морски бранови, со еден збор пејзажи.
Читај бе: Колку самостојни изложби сте имале досега и во колку градови сте гостувале?
-Оваа самостојна изложба е седма по ред. Првата изложба беше „Мариово Девствена убавина“, втора беше „Кајмакчалан гордоста на Ниџе“, па „Животот на Ромите“, 2011 година изложбата „Цветови“, 2015 година „Мариово и Пелагонија низ објективот на Катерина Мавровска“ и 2017 година „Црно Бело“. Со изложбите гостував во Скопје, Прилеп, Струга и Охрид повеќе пати.
Читај бе: На 10 мај ќе биде отворена Вашата најнова изложба, „Црно и бело е сè“. Кажете ни нешто повеќе за фотографиите кои ќе се најдат на изложбата, со каква техника и како се фотографирани…
-Мојата најнова изложба „Црно и бело е сè“ е нешто поразлично од првите изложби и содржи портрети на впечатливи ликови при случајни средби на улица и женски акт креативно во домашна просторија. А за да бидат повпечатливи фотографиите се во црно-бела техника.
Читај бе: Што е Вашиот предизвик кога се работи за фотографијата? Што е она што би сакале да го реализирате, а досега не сте имале можност?
-Кога се работи за фотографија предизвик може да ми биде било каква ситуација ако емотивно допре до мене. Нешто што би сакала да ми се реализира, а досега не ми се случило, е посета на егзотична земја на пример Кина, Тајланд итн. и да направам изложба со исклучително посебни фотографии на кои ќе биде отсликана друга, поинаква култура од нашата, поинакви пејзажи, поразлични изгреви и залези на сонцето…
