Македонија има нов шампион во авто-мото спортот. Мотоциклистот Синиша Кочоски го забележа својот најголем успех во кариерата и стана шампион во БМУ Европскиот шампионат, во најсилната Ф1.000 категорија.
Македонецот имаше сезона како од бајките на патеките ширум регионот, која беше крунисана со ново прво место во „Серес“, Грција. Без разлика на притисокот и влогот што го носеше финалето во Грција, македонскиот мотоциклист остана смирен, врочем каков што беше и цела сезона, и уште еднаш ја докажа својата доминација и заслужено се радува на големиот успех.
„Фантастична сезоната, историска. Сонував за ваков момент. Длабоко во себе верував дека можам да го достигнам врвот во овој шампионат. Се разбира дека патот до тоа не беше лесен. Сезоната беше многу напорна, конкуренцијата силна, проблемите секогаш ми висеа над глава, но чувствував дека оваа сезона е моја и на најдобар можен начин го искористив тоа и стигнав до посакуваниот трофеј во најсилната конкуренција на БМУ Европскиот шампионат.
Задоволен сум од постигнатите резултати, но воедно и свесен дека без големата поддршка од мојата фамилија, пријателите и фановите, немаше да бидат на местото каде што сум сега. Им благодарам на сите од се срце – вие сте моите шампиони!“, рече Кочоски.
Кочоски историската сезона во БМУ Европскиот шампионат ја заврши со четири победи и уште седум подиуми.
