На 23 мај, Власите низ цела Македонија го прославуваат својот национален празник кој го симболизира постоењето на влашкиот народ ширум нашата држава. Власите се заедница која според последниот попис спроведен оваа година, брои 0,34 отсто од вкупниот број попишани граѓани. Според законот за празници спроведен во 2007 година, 23 Мај е признат за национален ден на Власите, а воедно е државен празник и неработен ден за припадниците на влашката заедница.
Власите за прв пат биле признати како народ со потпишувањето на ирадето, на 22 мај 1905 година, од страна на султанот Абдулхамит Втори, а бил прославен за прв пат, на 23 мај 1906 година. Од тогаш, па се до денес, 23 Мај се прославува и одбележува во чест на постоњето и признавањето на влашкиот народ, јазикот, но и влашката култура. Денес Власите во Македонија присутни се во повеќе гранки и желбата за понатамошен развиток е забележителна во културната, медиумската, политичката и економската сцена.
Денес влашкото друштво и влашката заедница како од Битола, така и од останатите градови во Македонија, им овозможуваат на младите разновидни можности за развивање во одделот на образованието и едукацијата на високо рангирани универзитети како во Македонија, така и во странските земји.
За оваа пригода имавме можност да поразговараме со Стерјо Папули од Скопје, кој оваа година беше избран за заменик претседател на Партијата на Власите, на петтиот конгрес, одржан на 09.04.2022.
„Националниот ден на Власите е најважниот ден за истите на Балканскиот полуостров. Денес Власите исто како и своите предци се лојални граѓани на својата татковина, создаваат и работат за нејзините интереси и се нераскинлив дел од македонската нација. Една пикантерија: На новогодишната прослава во 1942 година во куќата на познатиот Влав/партизан Сотир Шута, во Струга за првпат е испеана македонската химна „Денес над Македонија се раѓа“. Да го чуваме и говориме јазикот, повеќе да придонесуваме за развој на истиот, затоа што немаш јазик-немаш идентитет. Честит нека е овој светол ден. За многу години” – изјави Стерјо Папули, заменик претседател на влашката партија.
