Иако општеството наметнува машки и женски работи, сепак постојат силни примери кои го докажуваат спротивното. Денешниот Меѓународен ден на жената го користиме да ги истакнеме овие примери кои се надеваме дека ќе бидат мотив и инспирација за промена на досегашните стереотипи.
Две жени, вработени во РЕК Битола покажуваат дека невозможни работи ако се има храброст, знаење и желба и дека секоја жена доколку има желба може да работи на работно место кое општеството досега не натерало да помислиме дека е машка работа.
Тие се Виолета Петковска, ракувач на погонска станица и Јасмина Мановска, рударски техничар во РЕК Битола.
Виолета го следи транспортот на јаглен од рудникот „Суводол“ до термоелектраната, а Јасмина работи со увозниот јаглен.
„Работата не е толку тешка колку што изгледа доколку се внимава и постојано се прати процесот на движење на јагленот, лентата, и кога има и кога нема јаглен, се оди во најдобар ред и нема да има ризик ако се прати“, вели Виолета.
„Работам со увозниот јаглен, ги прегледувам камионите, претежно е административна работа“, вели Јасмина.
Нивната порака на овој ден е дека жените не треба да се откажуваат од соништата заради широкораширените предрасуди и стереотипи кои владеат во нашето опкружување. Си ја сакаат работата, а досега немале искуство со родова дискриминација.
„Добро сум прифатена, без разлика на тоа што сум жена, ако сме жени не значи дека нема да ја сработиме работата или дека нешто не сме поспособни од мажите. Работата е работа, жените да бидат силни и сите предизвици да ги прифаќаат“, вели Виолета.
„Не е тешко, може да се работи оваа работа, а жените може да се снајдат. Да не се откажуваат од соништата заради општествените стереотипи“, порача Јасмина.
Извор: ТВ Тера
