Друштвото на ликовни уметници од Битола вечерва ја отвори изложбата по повод Интернационалниот ден на жената на 8 март во кристалната сала на Културно-информативниот центар – Битола.
Изложбата содржи дела на 19 членови на ДЛУБ реализирани во периодот 2022/23.
Иако на слободна тема, изложбата содржи две водечки мисли во контекст на празникот. Првата насочува кон аналогијата меѓу жената и уметничкото дело, односно појавата на метафизичкото и другото во физичкиот простор. Втората ги согледува причините за настанувањето на овој празник и затоа повикува кон поотворена и поискрена соработка меѓу самите уметниците, меѓу уметниците и разните институции со цел содавање простори каде може да се појави и сочува гласот на секој кутурен деец чии дела поинаку би останале неми и заборавени.
Делата се реализирани со традиционални и современи техники. Поголемиот дел од авторите се млади членови како Александар Поповски, Филип Јовески, Стефан Анчевски, Зана Восу, Алкивиадис Восду, Тони Попов, Петар Кирановски, Слободан Рајчевски, Васко Ѓоргиев, Анастасија Петрова-Мушовска, Валентина Илијевска, Динко Ненов и Дејан Макаријоски, додека од постарите членови на Друштвото учествуваат Панде Петровски, Љубица М. Солак, Николче Српчански, Ванчо Кеков, Златко Крстевски и Ѓорги Зајаковски.
