„Кавгата“ околу тоа дали се подобри кучињата или мачките трае отсекогаш, а на оваа тема внимание ѝ посветија и научниците. Според неколку истражувања, разликите меѓу љубителите на кучиња и љубителите на мачки не се гледаат само во изборот на миленик, туку и во нивните психолошки профили.
Едно истражување на Универзитетот Керол во САД покажало дека луѓето кои повеќе сакаат кучиња генерално се посреќни, додека љубителите на мачки постигнуваат подобри резултати на тестови за интелигенција. Во анкетата учествувале 600 студенти – 60% изјавиле дека преферираат кучиња, 11% мачки, а останатите ги сакаат и двете или ниту едно.
Научниците заклучиле дека карактерот на луѓето игра важна улога: љубителите на кучиња најчесто се поенергични, друштвени и дисциплинирани, додека љубителите на мачки се повеќе интровертни, креативни и чувствителни. „Ако сакате активности на отворено и дружење – кучето е идеален избор. Ако сте интроверт и сакате да читате книга дома – мачката подобро одговара“, објаснува истражувачката Дениз Гвастело.
Подетално истражување спроведено на колеџот Manhattanville во Њујорк, со 263 учесници на возраст од 19 до 68 години, покажа дека сопствениците на миленици генерално се позадоволни од оние кои немаат миленик. Притоа, сопствениците на кучиња биле посреќни од сопствениците на мачки.
Ако се земе предвид дека според одредени студии љубителите на мачки се поинтелигентни – можеби најдобрата опција е да ги сакаме и кучињата и мачките подеднакво.
