На иницијатива на Хуманитарната Организација „Утешител“ и група граѓани, се организира предбожиќна хуманитарна акција со цел да донесеме радост и утеха на оние кои имаат најмногу потреба.
Драги хумани и човекољубиви битолчани,
На Божиќ не смее да има гладно семејство, тага или болка.
Ако не можеме целосно да ги ублажиме страдањата на нашите сограѓани од социјално загрозените семејства, барем на Божиќ да им подариме радост со свечена празнична трпеза.
Секој кој сака, може да придонесе со донација на храна или хигиенски производи на следните пунктови низ градот:
Храм Св. Димитриј Храм Св. Недела Храм Св. Петка Божиќната пештера пред Офицерскиот дом Горно Веро Количките поставени во сите маркети на Шик Комерц
Акцијата трае до третиот ден на Божиќ – 9 јануари.
Добредојдени се сите кои можат да волонтираат, помагајќи во селектирањето на донираната храна, изработка на пакети и нивна достава до семејствата.
За нас
Хуманитарната Организација „Утешител“ е доброволно, добротворно здружение инспирирано од евангелската порака: „Љуби го својот ближен како самиот себе“.
Нашата мисија е остварување трајни хуманитарни проекти кои ќе помогнат во ублажување на материјалните потешкотии на нашите сограѓани, како и нивна духовна утеха.
Во рамки на Х.О. „Утешител“ функционира и Народната Кујна, која веќе 19 години се грижи за егзистенцијалните потреби на најзагрозените.
Да не заборавиме:
Сите, без разлика на статусот, се деца Божји. Сите заслужуваат утеха, радост и подадена рака. Помошта за другиот е помош за Човекољубивиот Богомладенец Христос.
„БОГАТСТВОТО НЕ СЕ МЕРИ ПО ТОА КОЛКУ ИМАШ, ТУКУ ПО ТОА КОЛКУ ДАВАШ!“
Богомладенецот Христос нека ве утеши, орадува и спаси.
Ви благодариме однапред за Вашата материјална и молитвена поддршка.
Со почит,
Х.О. „Утешител“ – Битола
