Новата година во Битола започна со најубави вести. Во Клиничката болница – Битола, на првиот ден од 2026 година, се родија првите две бебиња – женско и машко, кои го одбележаа почетокот на годината со радост и надеж.
Градоначалникот на Битола, Тони Коњановски, претпладнево ја посети Клиничката болница, посочувајќи дека веќе традиционално, првиот ден од годината е посветен на најубавиот можен повод – нови животи.
„Битола доби два нови жители – две мали души кои донесоа радост и надеж. Првото бебе е девојче по име Бистра, со симболично име за една чиста и успешна година, а второто е машко бебе, Петар. Двете мајки се битолчанки и ова им се први деца. Им посакавме здравје, среќа и уште многу радости во животот“, изјави Коњановски.
Двете новороденчиња се родени во добра здравствена состојба. Првото бебе има родилна тежина од 3.300 грама, а второто 3.460 грама. Како што информира д-р Тихомир Велевски, специјалист по гинекологија и акушерство, и мајките и бебињата се стабилни и под постојан медицински надзор.
Директорката на Клиничката болница – Битола, Ненси Лозанче, истакна дека двете мајки се прворотки и упати благодарност до целиот медицински персонал кој новогодишната ноќ ја помина работно и професионално.
Според надлежните, новогодишната ноќ поминала релативно мирно, како во болницата, така и во Итната медицинска служба.
Градоначалникот Коњановски го посети и детското одделение, каде на хоспитализираните деца им посака среќна Нова година и им подари новогодишни пакетчиња.
