Жирито на Интернационалениот фестивал на аматерскиот непрофесионален документарен филм „Камера 300“ започна со прегледување и оценување на пристигнатите филмови.
Петчленото меѓународно жири во состав: Љупчо Петровски, Недељко Деспотовиќ од Србија, проф.Д- Р Антон Антонов од Бугарија, м-р Гоце Господинов професор од Скопје и Благојче Божиновски од Битола ќе ги проследат сите 45 филма од 10 земји од Европа и ќе ја донесат одлуката кои филмови ќе влезат во официјалната програма, како и определувањето на наградите според правилникот на Фестивалот.
Наградите ќе бидат доделени на свеченото отворање на фестивалот на 3.11.2023.
ФЕСТИВАЛ ПОСВЕТЕН НA КАМЕРАТА 300
За македонскиот филм, како и за повеќето во светот, XX век останува буквално век на неговото создавање и растеж. Десет години по првата проекција во Гранд Кафе во Париз, Браќата Манаки Јанаки и Милтон co нивната сега веќе легендарната Камера 300 купена во Лондон од компанијата „Урбан“, од моделот „биоскоп“- сериски број 300, во дворот на нивната родна куќа во 1905 година ги снимиле првите подвижни слики кои наедно биле први на Балканот. Фактички, тој камен – темелник за македонската филмска историја е снимањето на нивната 114 – годишна баба Деспина како преде co други жени од семејството и соседството.
