Македонското научно друштво- Битола, на 26.4.2023 година ја прослави 63 годишнината од своето формирање. Во таа чест, се одржа трибината ,,За Костов” во КИЦ – Офицерски дом, трибина која уште еднаш го потврди грандиозното дело на битолскиот литературен великан Владимир Костов.
Владимир Костов беше битолски писател, романсиер, кој во 1983 година станал член на ДПМ, а во 2016 година избран и за почесен член на МАНУ. Тој претставува еден од најплодните автори во македонската книжевност, писател кој во своето творештво постојано се навраќа на родната Битола и успева да ги внесе читателите во својот свет, шетајќи ги по битолските улици. За жал, неговиот живот згасна на 3 јанураи 2023 година, меѓутоа токму оваа трибина и настаните во иднина посветени на неговиот лик и дело се доказ за тоа дека делото на Костов ќе остане во колективната меморија на книжевната јавност пред сѐ.
На трибината дадоа збор проф. д-р Невена Груевска, претседателка на МНД, исто така и проф. д-р Даниела Андоновска – Трајковска, проф. д-р Живко Андреевски, проф. д-р Анита Ангелевска, проф. д-р Александар Стерјовски, Весна Мундишевска-Велјановска, Милица Димитријовска-Радевска и писателот Добре Тодоровски.
Во улога на модератор на настанот беше Милена Касапоска Чадловска.
За музичкиот дел се погрижија ученичката Теодора Мицевска од ПСУ САБА и ученичките Зорица Јовчева и Санела Шукриевска од Државно музичко училиште – Битола.
Во текот на вечерта ученичките Андреа Триста и Тамара Талевска од ООУ,,Даме Груев” читаа извадок од делото ,,Дива мисла” . Додека пак средношколците од СОУ Гимназија ,,Јосип Броз Тито”- Битола, Вероника Стојковска и Филип Здравески каде токму писателот Владимир Костов го стекна средното образование, го затворија настанот со читање на извадок од неговото култно дело: ,,Црквичето четириесет маченици во Битола”.
