Во просториите на основното училиште. „Св. Кирил и Методиј “ – Битола се одржа промоција на книгата „Креативни техники за работа со деца во инклузија“ од авторите Тања Илиева и Александра Упале. Се работи за дело во кое авторите даваат техники за работа со деца во инклузивно образование.
Тргнувајќи од лично искуство низ книгата се проткајани конкретни примери за олеснување на образовниот процес на децата вклучени во инклузија.
„Изразувам голема благодарност за добрата воља и несебичната поддршка на рецезент д-р Марија Ристевска, печатницата Киро Дандаро за издавање на оваа книга како и на сите вработени во ОУ. „Св. Кирил и Методиј“ – Битола кои ни овозможија пријатен престој во училишните клупи. Ова е индивидуална програма, но истата може да биде искористена и за многу други деца со тешкотии во учењето. Во книгата е опишан начинот на изработка на материјалите со кои ученичката ги совладуваше поставените цели, вклучувајќи текстови и цртежи за нејзино описменување како и обработка на материјалот по сите наставни предмети“, изјави Тања Илиева.
Меѓусебната соработка помеѓу наставниците и родителите е многу важна во целокупниот образовен процес.
„За напредок и успех на децата во инклузивно образование потребна е меѓусебна соработка на родителите и наставниците, затоа што ние сме како делови од сложувалка кои треба да се вклопат за да добиеме јасна слика“, изјави наставник Александра Упале.
Оваа книга е издадена со надеж дека ќе послужи како пример за изработка на уште вакви материјали и ќе ја најде својата примена во рамките на инклузивното образование.
