По 25 години постоење како симбол на слободата, заедништвото и младинската енергија, EXIT фестивалот ја најави својата последна година во Србија, наведувајќи дека нема да молчи во услови на притисоци и укинување на слободата на говор.
Фестивалот, кој започна како студентско движење за мир и слобода, прерасна во еден од најголемите музички настани на светската сцена. Во изминатите две и пол децении, EXIT не само што донесе бројни интернационални признанија и милионски туристички прилив, туку беше и платформа за обединување, толеранција и социјални промени.
„Сметаме дека слободата нема цена. Затоа, годинашново јубилејно издание на фестивалот ќе биде последното што ќе се одржи во Србија во која се задушува слободата на говор. Иако знаеме дека сме добредојдени во многу делови од светот, на нашата публика ѝ должиме последно танцување на Петроварадинската тврдина,“ порачаа организаторите на EXIT.
Откако минатата година јавно застанаа на страната на студентите и нивната борба за праведно општество, организаторите на фестивалот се соочија со, како што велат, огромни финансиски и политички притисоци. Јавното кофинансирање од сите нивоа на власт им било целосно ускратено – одлука што го доведува во прашање опстанокот на фестивал од ваков обем.
Сепак, фестивалскиот тим останува одлучен – EXIT 2025, кој ќе се одржи од 10 до 13 јули во Нови Сад, ќе биде најемотивното и најнезаборавното издание досега. Ќе се слави 25-годишнината на фестивалот, заедно со студентите и сите оние кои веруваат во подобро утре.
„EXIT не е само фестивал, EXIT сме сите ние кои веруваме дека можеме подобро. И како што пред четврт век заедно ја запаливме искрата на промената, денес уште еднаш го браниме правото да живееме слободно,“ стои во соопштението.
Ако ова навистина биде последниот EXIT на Петроварадинската тврдина – нека биде величествено, незаборавно и најсилно досега.
