Во издание на Македонското научно друштво – Битола, излезе од печат новото дело на проф. д-р Марјан Танушевски – „Битолски хорологион II“, продолжение на неговата посветена хроника за минатото и сегашноста на Битола.
Книгата претставува уникатна мапа на битолскиот дух, раскажана преку живописни приказни, историски факти и туристички занимливости, што ја прави вредна за секој љубител на градот под Пелистер. Рецензентот д-р Љупчо Јаневски пишува:
„Авторот магично не враќа низ децениите и вековите во кои Битола имала свој автентичен шарм… Создава автентична мапа, туристички крвоток на градот кој треба да се прочита и прераскаже.“
Мозаикот од текстови, според м-р Валентин Соклевски, наликува на мозаиците од Хераклеја:
„Одлично избрани теми, временски избалансирани, повеќеслојни, преполни со универзални вредности… Танушевски ја стави Битола во центарот на временскиот виор, човекот во центарот на настаните.“
„Битолски хорологион II“ е повеќе од книга – таа е патување низ душата на градот, низ спомените и културните слоеви што нѐ повикуваат на ново читање, разбирање и доживување на Битола.
