И оваа година, по 16-ти пат, ќе се организира поклоничкото патување „По стапките на нашите предци“ во организација на Х.О Утешител. Ќе се оди пешки, согласно традицијата на нашите предци, а во чест на големиот и преподобен Свети Наум, Охридскиот чудотворец. Должината на патеката е околу 25 километри.
Се поаѓа организирано со превоз од Битола во недела на 2.07.2023 година, во 3.30 часот после полноќ од пред хотел Епинал.
„Последната дестинација од патувањето, од селото Лескоец-преспански се оди пешки по пресеката на нашата планинска убавица Галичица, баш по истата по која со векови оделе нашите предци, во чест и слава на Бога и на неговиот свет угодник – Св.Наум. По пристигнувањето, се сместуваме во дворот на манастирот и потоа учествуваме на свечената вечерна Богослужба. Се спие на отворено, во вреќи, во Божјиот хотел со илјадници ѕвезди. Утрото присуствуваме на Светата Божествена Литургија и торжествената благодатна радост која изобилно ја излева Св.Наум, охридскиот чудотворец на сите присутни. За да се организира превозот, секој кој сака да учествува на ова благодатно поклоничко патување нека се јави на телефоните: 077 803 823, 075 695 722“, информира Драги Анастасовски од Х.О Утешител.
Минатата година дел од ова поклоничко патување беа 50-тина учесници од повеќе градови кои пешачеа 10 часа до манастирот.
