НУ „Завод и музеј“ Битола гостуваше во македонскиот Културно информативен центар во Загреб, со „Мултисензорна изложба во 2Д и 3Д“ во рамките на проектот „Пристапно наследство за сите“.
На изложбата беа претставени тактилни копии од месинг од наши експонати, тактилни слики, текстови на Брајово писмо и аудио описи за предметите, подготвени на хрватски јазик.
Огромна благодарност за гостопримството упатуваме до Амбасадорот Милаим Фетаи и директорката на КИЦ во Загреб Наталија Поповска, за соработката во организацијата и реализација на проектот.
На настанот присуствуваа претставници од ЦОО Винко Бек, Тања Парлов- професорка по ликовна уметност во оваа специјална установа, Ивана Шалковиќ, раководител на одделот за млади и секако учениците, кои и покрај дождливото невреме со голем интерес пристигнаа на работилницата. Тие присуствуваа и на свеченото отварање на изложбата, го истражија презентираниот материјал и изразија голема желба да посетат некој македонски град. Се радуваме и на присуството на заинтересираните уметници и секако на возрасните лица со оштетен вид како и колегите од музеите во Загреб.
Тимот кој посветено работеше на проектот :
М-р Јове Парговски автор на тактилни слики и изработка на НФЦ тагови, м-р Моника Нолева дизајн и изработка на цртежи, Кирче Арсовски- тактилни копии од месинг, Неда Маретиќ- наратор на хрватски јазик, Андријана Шокларовска-текст на хрватски јазик на Брајово писмо, Студио Гимел-Мими Марковски и колегите кустоси- описи на предметите-Јасмина Гулевска, Енгин Насух, Владо Ѓоревски, Ефросинија Паревска и Јове Парговски.
Раководител на проектот е Д-р Ирена Ружин.
