Познатиот фудбалски стручњак, битолчанецот Димитар Капинковски ќе биде главен тренер на грузискиот фудбалски клуб „Самтредија“.
Од клубот денеска објавија дека македонскиот стручњак го одработи првиот тренинг во тимот и почна да се подготвува за следниот натпревар со стручниот штаб.
„Мило ми е што можам да ја соопштам веста дека сум нов тренер на ФК Самтредија. Се чувствувам среќно и почестено што сум дел од овој прекрасен и амбициозен тим и со нетрпение очекуваме заедно да постигнеме одлични резултати во блиска иднина“, вели Капинковски.
Во објавата на клубот за новиот тренер потенцираат дека тој е поранешен фудбалер на македонската репрезентација, а кога се работи за неговата тренерска кариера, беше селектор на „Пелистер“ и на „Победа“.
