Вечерва во Свечената сала на Офицерски дом- КИЦ Битола во 20.00 часот ќе биде отворена тематската изложба на фотографии во рамки на одбележување на јубилејот 20 години АРТ ПОИНТ – ГУМНО:
Ероу Рос, САД: ПОСЛЕДНИТЕ СЕЛАНИ
Американскиот фотограф со данско потекло и светска репутација Ероу Рос беше еден од првите гости на уметничката резиденција на АРТ ПОИНТ – ГУМНО во с. Слоештица. За време на неговиот едномесечен престој во селото, есента 2005 година, тој буквално го документираше животот на едно македонско село. Во рамките на т.н. ПРИКАЗНА ЗА ЛЕБОТ, како што беше наречена неговата фото-авантура во Слоештица која според него е „вистински рај за фотографирање“, Рос направи и серија портрети на жителите, оние што беа вечна инспирација и за Петре М. Андреевски. Во една прилика Петре ќе каже: „Овдека се сите луѓе, сите пејзажи, сите простори што влегле во мојата поезија и без кои не знам за што би пишувал“.
Портретите на ПОСЛЕДНИТЕ СЕЛАНИ ќе бидат во фокусот на оваа тематска поставка што е дел од серијата изложби со кои меѓународниот центар за уметност и одржлив развој АРТ ПОИНТ – ГУМНО го одбележува 20 годишниот јубилеј.
На отворањето ќе бидат прочитани и стихови инспирирани од Македонија и Слоештица од американскиот поет, сликар и музичар Дик Робертс, а присутните ќе можат да видат и две оригинални изданија посветени на жителите од Слоештица: “Faces” („Лица“) од американскиот уметник Сет Ладман и “Village Treasures” („Скапоценостите на селото“) – дневникот на Џун Тилден, придружничката на Ероу Рос во Слоештица.
Ирена и Сергеј Андреевски
