Светски познатиот диџеј и музички продуцент Steve Aoki ќе настапи во Битола на 2 август – Илинден, на стадионот „Петар Милошевски“, на концерт со бесплатен влез за сите посетители.
Настанот е во организација на Avalon International Booking и ќе го означи почетокот на прославата по повод 35 години од независноста на Македонија, која ќе кулминира со централната манифестација на 8 Септември.
Покрај Steve Aoki, публиката ќе има можност да ужива и во настапите на домашните изведувачи CYRILLIC, TASEV, MONARCH и FACE, кои ќе бидат дел од целосната музичка програма.
Организаторите најавуваат вечер исполнета со енергија, спектакуларна продукција и музичко доживување, а упатуваат покана до посетители од целата држава да бидат дел од прославата.
„Прославата на 35 години независност на Македонија започнува токму на нашиот најголем историски празник – Илинден, со еден од најактуелните диџеи на светската сцена. Влезот за концертот на Steve Aoki ќе биде бесплатен“, соопштија од Avalon International Booking.
Концертот ќе се одржи на 2 август на стадионот „Петар Милошевски“ во Битола, а организаторите порачуваат:
„За 2 август, каде и да си – во Битола да си!“
