Книгата 40 Фејсбук приказни од Александар Гулевски е објавена во 2020 година. Таа е збир од белешки на авторот, објавувани на неговиот фејсбук профил. Поучни, добронамерни, зборови преточени во мудрости кои замислуваат, инспирираат…
Бунар
петок, 27 ноември 2009 во 19:12
Пред некој ден, во едно село, се случил необичен настан. Имено, на еден селанец му паднало магарето во длабок бунар. Со часови
животното се мачело и рикало од бунарот, но залудно. Селанецот не можел да смисли начин како да го извади оттаму. Најпосле, донел
одлука. Магарето е и онака старо, ќе го затрупа во бунарот.
Се собрале сите соседи за да му помогнат и почнале да фрлаат земја и ѓубре во бунарот. Магарето сфатило за што станува збор и за-
почнало уште повеќе да рика. По извесно време сосема стивнало. Од бунарот повеќе не се слушало рикање и сите присутни се зачудиле.
Селанецот се доближил до работ на бунарот за да види што се случува и не можел да се изначуди. Се восхитил на ритуалот што го правело магарето. Кога селаните ќе фрлеле земја и ѓубре во бунарот, тие паѓале точно на грбот на магарето, а тоа, инстинктивно, сето тоа го тресело понастрана од себе. И така, со секоја лопата земја и ѓубре фрлени во бунарот, тоа се искачувало скала по скала погоре, сѐ додека слободно, со малку напор, не изрипало само од бунарот, наочиглед на сите присутни.
Така е и во животот. Кога ќе се најдеме во неволја, тогаш сме како магарето во бунарот. Врз нас фрлаат и земја и ѓубре, нѐ затру-
пуваат, а ние викаме и очајуваме. Клучот за излегување од таквиот бунар е во силата сето тоа ѓубре да го истресеме понастрана од себе и
храбро да се искачуваме по скалите нагоре. Секоја наша потешкотија е, всушност, скала. Можеме да излеземе и од најдлабокиот бунар, но
само со упорност. Без откажување. Затоа, не чекајте, истресете го ѓубрето од себе и ете сте на следното скалило. А колку скалила има? Не
знам. За тоа можеби ќе зборуваме другпат…
