Ракометарите на Еурофарм Пелистер го освоија третото место на завршниот турнир на СЕХА лигата, откако во „малото финале“ во Задар го совладаа хрватскиот вицешампион Нексе Нашице со 27-23 (12-13), лесно заборавајќи го поразот од Веспрем.
Ларс Валтер, тренерот на Еурофарм Пелистер после победата истакна:
„Мислевме на себе, а не на противникот. Важно ни беше да победиме, но и да играме добро. Денес видовме дека имаме тим, посебно што игравме без Руди Сери. Позитивно беше да се види Суси, кој се врати од повреда и покажа дека ќе биде засилување за нас. Ова е одлична реакција по поразот во петокот“.
Капитенот, Мирко Радовиќ рече дека овој турнир многу ќе им користи за новата сезона.
„За мене најважно е што ја подигнавме главата по поразот од Веспрем. Ова беше машки, фајтерски дуел и им вративме на Нексе за поразот минатата сезона. Им го запамтивме тој пораз во Европската лига и им се реванширавме. Мојата екипа покажа како се игра како тим и се врати од негатива, за да дојде до заслужена победа. Оваа победа ни дава голема самодоверба пред предизвиците кои ни претстојат“.
Жарко Пешевски и Усана Хосни пак се најдоа во идеалниот тим на завршниот турнир.
