РК Еурофарм Пелистер 2 денес во спортската сала „Боро Чурлевски“ во Битола ги започна подготовките за вториот дел на сезоната. Александар Јовиќ на располагање има седумнаесет ракометари, со кои ќе работи во првата фаза од подготовките. Петар Атанасијевиќ е дел од македонската репрезентација која ќе настапи на Светското првенство во Полска и Шведска, а Василије Печурица има обврски со младинската селекција на Црна Гора. За разлика од есенскиот ростер Еурофарм Пелистер 2 ќе биде послаб за Дејан Кукуловски кој го спогодбено го напушти клубот и потпиша за Брно (Чешка).
За време на подготовките, кои целосно ќе ги мине во Битола, екипата ќе тестира со Еурофарм Пелистер, а предвидено е да одигра и еден меѓународен натпревар. Трета година по ред Еурофарм Пелистер 2, иако е најмлад суперлигаш, ќе игра во плеј-офот, во борбата за титулата и европските места.
Александар Јовиќ, тренерот на Еурофарм Пелистер 2 изјави:
„Управата на Еурофарм Пелистер 2 правилно размислува и има добра стратегија и визија, а резултатите тоа го покажуваат. Ние трета сезона ќе играме во плеј-оф и мислам дека со нашите добри игри тоа го заслуживме. Напоредно создаваме играчи за првата екипа и остваруваме резултати.
Подготовките ќе ги спроведеме комплетно во Битола. Ќе одиграме неколку меѓусебни натпревари со Еурофарм Пелистер, а може да играме и еден меѓународен натпревар.
Особено ми е мило што како најмлада екипа во првенството, се пласиравме во плеј-оф и пренесовме еден бод. Ќе бидеме најмлади и во плеј-офот и ќе си поставиме цели. Ќе играме растеретено, но со цел ниедна екипа не смее да биде поборбена од нас. Треба да играме квалитетна и агресивна одбрана, преку која ќе постигнуваме лесни голови во напад“.
