Постои ли нешто поубаво од мирисот на свежо печени сливи што се шири низ кујната? Домашниот џем од сливи е токму тоа – едноставен, миризлив и полн со носталгија. Најубавото е што за неговата подготовка не е потребно долго мешање над шпорет – доволно е да ја вклучите рерната и да ѝ дозволите таа да ја заврши најголемата работа наместо вас.
Овој рецепт е идеален за сите кои го сакаат природниот вкус на сливите, а сакаат и полесна подготовка без многу труд. Резултатот е густ, сладок и ароматичен џем кој совршено се вклопува со топол леб или палачинки.
Обично на еден килограм сливи се додаваат околу 200 грама шеќер, но бидејќи зрелите сливи се сами по себе послатки, количината може да се намали или дури и да се изостави.
Состојки за џем од сливи во рерна:
- 3 кг зрели и меки сини сливи
- 300 г шеќер
- 2 ванилин шеќери
Подготовка:
- Сливите измијте ги добро, извадете ги коските и исечкајте ги на помали парчиња.
- Ставете ги во подлабока тава или огноотпорен сад за рерна (за да не прска премногу сокот).
- Печете на 200 °C додека сливите не зовријат.
- Намалете ја температурата на 150 °C и печете уште околу еден час, со повремено мешање на секои 20-тина минути.
- Потоа додајте го шеќерот измешан со ванилин шеќер и вратете во рерната на уште еден час, повторно мешајќи повремено.
- Врелиот џем ставете го во загреани тегли, добро затворете и свртете ги наопаку додека целосно не се изладат.
Со овој едноставен рецепт ќе добиете совршен зимски деликатес кој ќе ве потсетува на мирисите од детството секој пат кога ќе ја отворите теглата.
