Детското ликовно студио „Свети Кирил и Методиј“ Битола на покана на КУД „Дримкол“ Вевчани и Здружението за афирмација на туризмот – културата и културното наследство „Вевчани турист инфо“ реализираа еднодневна ликовна колонија на која членовите сликаа староградска Вевчанска архитектура.
15 ученици на Детското ликовно студио „Свети Кирил и Методиј“ Битола 10 часа сликаа староградска вевчанска архитектура при што работниот колониски ден го реализираа низ повеќе локации низ Вевчани, додека синоќа пред жителите на Вевчани поставија и изложба на отворено во рамките на Мултикултурниот центар „Коста Србакоски“.
Соработката е помеѓу КУД „Дримкол“ Вевчани со поддршка од Општина Вевчани и по Проект од национален интерес на Министерството за култура. Со еднодневната колонија воедно започна и ХIII издание на Фестивалот на народна култура „Пображење”, а учениците на ДЛС „Свети Кирил и Методиј“ Битола сликаа на тема „Народната култура во Вевчани – инспирација за младите ликовни уметници”.
Фестивалот ќе трае и следните 2 дена, а завршува традиционално на 19 август на големиот православен празник „Преображение Христово” што е и слава на Општина Вевчани.
„Ние Вевчани во рамките на нашата 42. годишна светска детска ликовна колонија „Мал Битолски Монмартр” го имавме на колониската мапа над 30 години. Овој еднодневен настан воедно е и можност на враќање на малку подзаборавената традиција за која ќе се радуваат сите наши гости – учесници на МБМ од цел свет. Одлична организација – голема благодарност на организаторот КУД „Дримкол“ Вевчани – особено до директорот на фестивалот Тошо Чочороски и она што е особено за нас битно, огромно задоволство на нашите членови кои имаат можност да го остварат својот ликовен талент” – изјави Томислав Стерјев, координатор за ликовни активности при ДЛС Свети Кирил и Методиј Битола.
