Меморијалниот натпревар во спомен на Трајан Кочишки-Куља ќе се игра и оваа година по четврти пат. Откако овој натпревар секое лето нуди изненадувања, сега подготви уште едно. По гостувањето на ветераните на големиот Партизан, култниот Тетекс од Тетово, „вечното дерби“ на македонскиот фудбал меѓу Пелистер и Вардар, гостувања на култни клубови од регионот и од земјата, летово турнирот подготви ново издание.
По „вечното дерби“ од минатата година, оваа година ќе има шампионски натпревар.
Силите ќе ги одмерат младинскиот шампион на Македонија, екипата на Македонија Ѓорче Петров, предводена од легендата Боби Божиновски и пионерскиот шампион на Македонија, битолски Пелистер, предводени од еден од најдобрите тренери во младинска и пионерска конкуренција Никола Мрмачовски.
Оваа година како увертира за натпреварот ќе има фудбалски хепенинг за најмалите, четири екипи со по две генерации.
Четвртиот меморијален фудбалски натпревар во чест и спомен на Трајан Кочишки-Куља ќе се одржи на 30 јули 2023 година во 17:00 часот на стадионот во село Црно Буки.
