Изложбата „Првите кралеви на Европа” која беше отворена во Филдовиот музеј од Чикаго, овозможи претставување на околу 700 археолошки предмети од 11 земји и вкупно 26 музеи во Европа. Помеѓу овие предмети, за прв пат во Америка, се изложени дваесетина предмети од три македонски музеи и тоа: НУ “Завод и музеј”- Битола, НУ “Музеј -Гевгелија” и НУ “Завод и музеј” – Прилеп.
Овој настан е дотолку позначаен, бидејќи ова е прво претставување на еден значаен сегмент од македонската култура пред пошироката американска јавност, вели директорката на НУ Завод и музеј Битола, Мери Стојанова,.
Изложбата „Првите кралеви на Европа (First Kings of Europe)“ е резултат на иницијативата на Филдовиот музеј од Чикаго и соработката со Завод и музеј – Битола, Музеј Гевгелија и Завод и музеј – Прилеп. Национален координатор на изложбата е Гоце Наумов, при што направена е селекција на повеќе предмети од неолитот, енеолитот и железното време, пронајдени на локалитетите Врбјанска Чука, Шуплевец и Милци.
Во подготовката на изложбата од Завод и Музеј Битола учествуваа директорот Мери Стојанова и кустосот Јасмина Гулевска од Завод и музеј – Битола.
Изложбата, која е составена од македонски и од балкански археолошки предмети, во Чикаго ќе трае до крајот на годинава, а потоа турнејата продолжува во Историскиот музеј на Канада во Гатино-Отава. Претходно, изложбата беше претставена во Институтот за древни студии во Њујорк.
Гостувањето на изложбата „Првите кралеви на Европа“ во периодот од 2022 до 2024 година е во организација на Филдовиот музеј од Чикаго.
