Со доделување на фестивалските награди и изведбата на претставата „Гидионовиот јазол“, синоќа во Битола свечено беше затворено 27. издание на Интернационалниот фестивал на монодрама. За најдобрите остварувања одлучуваше стручното меѓународно жири составено од Керолајн Бернс Кук, Анџелина Роска и Кире Ѓоревски.
Наградата за најдобар актер ја доби Јано Изорија од Грузија за улогата во претставата „КВАРКВАРЕ“, во продукција на театарот „Поти Валеријан Гунија“, во режија на Саба Асламазишвили. Жирито оцени дека станува збор за брилијантна изведба со силен темперамент, енергија и внатрешна напнатост, која го задржува вниманието на публиката од почеток до крај. Особено беше нагласена разновидноста на актерските изразни средства и длабочината во градењето на ликот.
Наградата за најдобра режија ѝ припадна на Жива Бизовичар за претставата „ЏЕКИ“, во продукција на Драмски театар од Македонија, со актерката Трајанка Илиева – Вељиќ. Според жирито, режијата се одликува со суптилна работа со актерот, органско водење низ различни внатрешни состојби и прецизно изграден темпо-ритам.
Гран при наградата ја доби претставата „#НОТИ“ од Романија, во продукција на театарот „Тони Буландра“, во режија на Касандра Топологеану, со актерката Андреа Танасе. Жирито истакна дека станува збор за современ театарски проект кој успешно ги обединува физичкиот театар и психолошката димензија, отворајќи теми за изолација, насилство и женственоста, поддржани со силна сценографија и звучна атмосфера.
Наградата од публиката ја доби претставата „ЏЕКИ“, со што ова остварување доби двојно признание.
Со ова заврши уште едно успешно издание на фестивалот, кој и годинава донесе богата програма и врвни актерски достигнувања од повеќе земји, потврдувајќи го своето значење како важна меѓународна театарска платформа.
