Здружението на деца и млади со попреченост и нивните родители „Невроразлични“ – Битола организира стручна трибина на тема „Етиологија, дијагноза и третман на деца со аутизам“, на која како предавач ќе учествува истакнатиот научник д-р Наги Момени.
Настанот ќе се одржи на 31 јануари 2026 година, во периодот од 11:00 до 14:00 часот, во КИЦ Офицерски дом – Битола.
Д-р Наги Момени е Ph.D по биомедицински науки, истражувач и иноватор на нов крвен биомаркер за нарушувањата од аутистичниот спектар, кој е национално и меѓународно патентиран. Тој има долгогодишно искуство во биомедицинските истражувања, со посебен фокус на аутизмот, невроразвојните нарушувања и примената на современи научни методи во клиничката пракса. Докторатот го има одбрането на Универзитетот Линеус во Шведска, а неговата работа е презентирана на бројни национални и меѓународни семинари и конгреси, како и во рецензирани научни списанија.
На трибината ќе се зборува за:
- причините (етиологијата) на аутизмот,
- современите пристапи во дијагностиката,
- можностите за рана детекција преку биомаркери,
- третманот и системската поддршка за децата и семејствата.
Настанот има за цел да ги обедини родителите, стручните лица, едукаторите, здравствените работници, но и сите граѓани кои имаат директно или индиректно влијание и разбирање за тоа што значи да се биде поразличен. Трибината нуди простор каде предизвиците, новитетите и системските решенија ќе бидат разгледани на едно место, преку научен, но и човечки пристап.
Организатор на настанот е Бела Салат, соработници на проектот се Ивана Ристова и д-р Билјана Талевска Антоновски.
