МК „Конзули“ од Битола годинава одбележува значаен јубилеј – 15 години постоење и активно делување на мото-сцената. Клубот е препознатлив по својата посветеност на промоција на одговорно и безбедно возење, развој на мото-културата и силна општествена ангажираност преку хуманитарни и едукативни активности. По повод јубилејот, разговаравме со членовите на МК „Конзули“ за почетоците, визијата, мисијата и плановите за одбележување на овој значаен датум.
Читај бе: Кога пред 15 години го формиравте МК „Конзули“, која беше основната идеја и цел што ве обедини како клуб?
МК Конзули: МК „Конзули“ е оформен од група ентузијасти кои препознаа потенцијал во мото-дружбите и во организираното делување како клуб, со цел развој на мото-спортот и мото-културата воопшто. Основната идеја што нè обедини беше да ги споиме љубовта, желбата и хобито кон моторите со промоција на безбедно и одговорно возење. Од самиот почеток се залагаме за законско учество во сообраќајот – поседување возачка дозвола, регистриран и технички исправен мотоцикл, како и задолжително користење заштитна опрема, без разлика на должината на релацијата.
Читај бе: По една и пол деценија постоење, дали сметате дека успеавте да ја остварите таа почетна визија и што најмногу ве прави горди од изминатите години?
МК Конзули: По 15 години постоење, сметаме дека оставивме значаен траг, особено кај младите моторџии и почетниците во сообраќајот. Преку личен пример, активности и директни укажувања, постојано ја нагласуваме важноста од почитување на сообраќајните правила и законите. Најмногу нè прави горди тоа што денес МК „Конзули“ е препознаен како клуб што промовира одговорно однесување, безбедност и вистински мото-вредности.
Читај бе: Една од мисиите на клубот е едукација и промоција на мото-културата. Колку, според вас, денес граѓаните имаат поинаков поглед и поголема свест за мото-заедницата?
МК Конзули: Иако сè уште не можеме да кажеме дека сме општество со високо ниво на сообраќајна култура, евидентен е напредокот. Свесноста за мото-заедницата полека расте, но нашата мисија тука не завршува. Континуирано работиме на тоа моторциклизмот да биде прифатен како рамноправен и нормален дел од сообраќајот, со меѓусебно почитување меѓу сите учесници. Веруваме дека со секој изминат ден, чекор по чекор, придонесуваме кон поголема безбедност и разбирање.
Читај бе: Какви активности и настани најавувате по повод јубилејниот 15-ти роденден и како ќе го одбележите овој значаен момент за клубот и градот Битола?
МК Конзули: Нашиот 15-ти јубилеен роденден ќе го одбележиме на 31.01.2026 година, со почеток од 20:00 часот, во Ресторан „Вавилон“. Настанот ќе биде збогатен со настапи на две рок-групи – Група Баклаби и Група Феникс, со добра музика, вкусна скара, пиво и секако роденденска торта. Влезот е слободен и настанот е од отворен карактер – поканети се сите пријатели, моторџии, поддржувачи и добронамерници. Имаме најавени гости од цела Македонија, како и од регионот.
Овој настан е само дел од нашите активности во 2026 година. За време на новогодишните и божиќните празници го организиравме традиционалниот настан „Дедо Мраз на мотор“, на 3 јануари, при што беа поделени над 200 новогодишни пакетчиња за дечиња, а беа посетени и децата од Регионалниот центар „Кочо Рацин“ – Битола. Пред Божиќ, во соработка со Off Road клубот „Пелистер“, обезбедивме пакети со храна и намирници за 13 семејства од социјален ризик.
