Денеска, во спортската сала на Гимназијата „Јосип Броз Тито“ во Битола, се одржа завршниот турнир од државното првенство во кошарка за средни училишта од цела Македонија.
Настанот го отворија проф. Александар Туфекџиевски, претседател на Федерацијата за училишен спорт на Македонија, градоначалникот на Битола, д-р Тони Коњановски и директорката на гимназијата Лидија Споа, кои упатија поздравни зборови до учесниците и присутните.
Во возбудливите полуфинални натпревари, кошаркарите на „Јосип Броз Тито“ од Скопје во драматична завршница беа подобри од домаќинот – гимназијата со исто име од Битола, додека тимот на „Јосиф Јосифовски“ од Гевгелија ја совлада екипата на Гимназијата „д-р Ибрахим Темо“ од Струга.
Во натпреварот за третото место, битолската екипа извојува победа над стружани. Финалето донесе одлична кошаркарска претстава на младите таленти од Скопје и Гевгелија, а победата со резултат 70:60 сосема заслужено ѝ припадна на екипата на „Јосип Броз Тито“ од Скопје.
Трите првопласирани екипи добија пехари и дипломи како признание за нивниот успех. Турнирот беше одлично организиран од страна на Гимназијата „Ј.Б.Тито“ од Битола, ОСУС Битола и професорите Михајло Силјанов и Антонио Трпковски.
Натпреварите беа беспрекорно водени од судиите Димитар Георгиевски и Иван Тасев, а записничката маса професионално ја менаџираше делегатот Јован Христовски.
