Заврши 10. Меѓународен велигденски кошаркарски турнир „Битола 2022“

Два дена Битола беше центар на младинската кошарка во Мaкедонија. 16 екипи во 3 категории се натпреваруваа на 10. Меѓународен Велигденски кошаркарски турнир „Битола 2022“ кој што беше во организација на КК „Младост“ и Општина Битола. Натпреварите се одиграа во 3 спортски сали со учество на преку 200 млади кошаркари и кошаркарки. Свој натпревар имаа и ветераните на КК „Младост“ кои потсетија на времето кога беа два пати прваци на државата во младинска конкуренција и имаа повеќе успешни настапи на турнири ширум Европа во периодот 2003-2007 г. Единствена екипа од странство беше „Olympia Larissa B.C.“ од Лариса-Грција која прикажа игра на ниво на кошарката од земјата од каде доаѓа.

Организаторот додели медали и дипломи на најдобрите по категории, а беа прогласени и најдобри играчи (MVP) во секоја категорија.

-Како и секоја година во минатото турнирот помина во одлична организација и добри натпревари. Задоволен сум од постигнатите резултати и воопшто квалитетот на натпреварите. Им благодарам на екипите од другите градови, посебно на нашите гости од Грција кои учествуваа на турнирот-изјави Горјан Стојановски, претседател на организациониот одбор на турнирот.

-Прв пат учествуваме на ваков турнир во странство. Одлично организиран од професионалци и задоволен сум од постигнатиот пласман. Остануваме во контакт со КК „Младост“ од Битола со кого во иднина ќе одиграме и пријателски натпревари кај нас-изјави Парис Сокас, тренерот на „Olympia Larissa B.C.“.

-КК „Младост“ на чело со Горјан Стојановски одлично си ја знае работата кога се во прашање вакви турнири. Турнирот беше организиран на високо ниво со квалитетни натпревари-изјави легендата на македонската кошарка Стерули Андоновски кој двата дена со посебно внимание ги следеше натпреварите.

                                                                                                    Владимир Прчков

РЕЗУЛТАТИ

ДЕВОЈКИ 2008/09

1. Пробаскет (Кавадарци)
2. Пелистер/Младост (Битола)
3. Охрид

Најдобар играч (MVP): Лиле Ѓорѓиева (Пробаскет)

МОМЧИЊА 2005/06

1. Охрид
2. Пелистер/Младост
3. Декса (Прилеп)

Најдобар играч (MVP): Стефан Капевски (Охрид)

МОМЧИЊА 2007/08

1. Пелистер/Младост (Битола)
2. Olympia Larissa B.C. (Грција)
3. Охрид

Најдобар играч (MVP): Наум Марковски (Пелистер/Младост)