Во организација на Православниот мисионерски центар Св.Нектариј Битолски од Битола, и со благослов на владиката Петар, се организираше вториот Летен образовен камп во хотел Lake View на Преспанското езеро.
На кампот имаше 40 деца, од кои 20 деца беа од социјално загрозени семејства и за нив беше бесплатно. Во програмата на активностите имаше часови по веронаука, по Православно византиско пеење, по Православен иконопис, по руски јазик и нормално многу игри, капење и забава.
„Кампот го започнавме со Света Божествена Литургија во црквата Пресвета Богородица од Битола, а потоа ги посетивме нашите постари и немоќни дедовци и баби од Старскиот Дом Сју Рајдер од Битола, а потоа и до манастирот Св.Ана во с.Маловиште.
Три дена бевме на Охридско езеро, во посета на црквите Св.Климент на Плаошник, Св.Јован Канео, Св.Софија, Св.Наум Охридски… и се разбира на капење… Главната цел на овој проект е децата да се социјализираат, да се запознаат со Моралниот вредносен систем на нашата Православна вера, со Евангелската радост на животот, да го зголемат духовниот имунитет и волевите сили за да бидат подобри, посилни, порадосни и поодговорни личности во сите премрежја и искушенија во нивниот живот. Да бидат радост и утеха на родителите, на својот народ и прави, достојни чеда на Господа. Главни донатори беа благочетиво семејство од Швајцарија кои и сами учествуваа, Томе и Константина Таневски и ќерката Агнија“, изјави Драги Атанасовски.
