80 години хумана работа, подавање рака и помош секаде каде што е најпотребно – сето тоа одбележано под мотото „Ние гледаме луѓе“.
Овогодишниот јубилеј – 2025 година – ја одбележува 80-годишнината од основањето на Црвениот крст на Македонија. Во изминатите осум децении, Црвениот крст на Македонија постигна значителен напредок во обезбедувањето хуманитарна помош и поддршка за граѓаните на нашата земја и пошироко.
Осврнувајќи се наназад на богатата историја и поддршката што ја обезбедивме за многу луѓе, свесни сме дека нашите постигнувања не би биле можни без несебичната помош од локалните заедници, институции и поединци кои секогаш беа тука кога беше најпотребно.
Општинската организација на Црвен крст – Битола го одбележа овој јубилеј со посебен акцент на соработката со локалната самоуправа, како и со општините Битола, Могила и Новаци, кои се значајни партнери во реализацијата на бројни активности и проекти. Во знак на благодарност, на градоначалниците им беа доделени јубилејни признанија.
Настанот беше проследен со музички изведби од волонтерите на Клубот на млади, како и со осврт кон работата на организацијата во изминатиот период.
фото: Маја Богоевска
