Синдикатот на РЕК Битола традиционално, по повод Денот на рударите, ги организираше Спортските работнички игри. Вработени во комбинатот се натпреваруваа во три дисциплини во машка и две дисциплини во женска конкуренција. Најуспешните ќе бидат наградени, а Синдикатот најавува дека ќе додели награди и на десетина работници кои од минатиот до овој 28 август се истакнале со својата вредна работа во комбинатот.
Натпреварите во куглање се одржаа во кугланата на Спортската сала Боро Чурлевски. Кај жените најуспешна беше Наташа Велјановска, на второто место се пласира Даниела Јанкуловска, а трета заврши Даниела Петковска.
Во машка конуренција, најмногу кегли собори и го освои првото место Сотир Гулески, второто место му припадна на Борче Бејковски, а на третата позиција е Димче Петковски.
Најпрецизно во таблата за пикадо годеше Снежана Талевска, второто место го освои Елена Банаковска, а на третото место заврши Снежана Дојчиновска.
Турнирот во бељот повторно беше една од дисциплините што привлече најголемо внимание помеѓу учесниците на Спортските работнички игри. На брегот на Преспанското езеро, во битолското феријално одморалиште во Претор, 19 пара се надмудруваа во оваа традиционална битолска игра со карти. а многубројната публика уживаше во нивните мајстории. На крајот, заа најдобар пар се прогласени Тони Ристевски и Тони Димовски. Второто место го освоија Васко Дисковски и Илија Дисковски, а на третото место се пласираа Оливер Митревски и Ѓорѓи Ѓорѓиевски.
Натпреварите од турнирот во мал фудбал се играа на Ракометното игралиште во Битола, a првото место го освоија вработените од екипата Недопирливи кои во финалниот натпревар ги совладаа колегите од екипата Брод. На третото место се пласира екипата Електро одржување.
