Ракометната школа Винда од Битола го прослави својот 5-ти јубилеј. Формирана е во 2017 година од ракометарката Викторија Мурговска – Винда. Целта на формирањето на клубот беше да им се овозможат услови на девојчињата кои го сакаат ракометот да го остварат својот сон.
„Денес го прославивме првиот јубилеј – 5 години од постоењето на РК Винда. Кога ќе се вратам наназад и кога ќе помислам на мотивацијата за основањето на клубот, на памет ми доаѓаат две работи: малата Винда која би била пресреќна да биде дел од ваков клуб и заедница и еден совет од еден почитуван професор: „Работи го тоа што најмногу го знаеш и умееш“. Децата се мојата инспирација. Откако заминав во Швајцарија се враќам само неколку пати годишно, но доволно да си ги наполнам батериите со благодарноста и позитивната енергија на девојките која ми трае до наредниот пат. Тренерите Марија и Иван, кои ја презедоа мојата работа се заслужни за овој јубилеј подеднакво со мене. Уверена сум дека со ваквиот начин на работа за 10-от јубилеј ќе се пофалиме со барем дупло поголеми успеси“, изјави Винда за Читај бе на прославата која се одржа во спортската сала на ОУ „Коле Канински“ каде воедно се одржуваат и дел од тренинзите.
