Во Свечената сала на Офицерски дом се одржа промоција на книгата на Томе Поповски „Бела ноќ, црн ден – Воден“. Промотор на книгата беше Гордана Такец, додека конференсие и наратор на промоцијата беше Силвана Петрова Насух.
„Бела ноќ, црн ден-Воден“ е прозна автобиографска сага инспирирана од трагедијата на македонскиот народ во Егејска Македонија.
Роман за тажната судбина на авторот испреплетена со судбините на многу Македонци кои мораат да ги напуштат своите домови за да бидат раселени низ светот, пишуван верно, вистинито и со многу љубов за родното Јаворани, село во околината на Воден.
„Низ раскажувањето за белата ноќ, нападот врз Воден во најстудената зима во 1946 г. записите за црниот ден исто така поврзани со Воден, од секоја реченица се назира тагата која никогаш не престанала да го измачува авторот Томе Поповски.
Со убав и високо интелектуален јазик разбирлив и близок до секого, романот не остава простор за рамнодушност.
Читателот се соживува со секое дејствие, го доживува случувањето како лично свое затоа што писателот умее вешто да прераскажува, ги води јунаците низ дејствието на романот, природно, спонтано и без усилби се доближува до срцето на читателот“, вели за книгата промоторот на книгата, Гордана Такец.
Томе Поповски е писател со огромен творечки габарит, а ова негово дело е запис од висока книжевна вредност затоа што истовремено е историја, култура, традиција и наука.
Фотограф: Саше Богоевски
