Синоќа во свечената сала на КИЦ – Офицерски дом се отвори изложбата на тематски фотографии во рамките на одбележување на јубилејот 20 години Арт Поинт – Гумно. Автор на фотографиите е Ероу Рос, кој е американец со данско потекло и е насловена како „Последните селани“.
Рос има светска репутација како фотограф и беше еден од првите гости во уметничката резиденција на Арт Поинт – Гумно во село Слоештица, демирхисарско каде веќе дваесет години твореле над 80 уметници од целиот свет.
Изложбата ја најави директорката на КИЦ, д-р Лили Бошевска, додека уводните зборови ги започна Сергеј Андреевски, кој секако се повика на романот на неговиот татко, легендарниот македонски писател Петре М. Андреевски кому и на скромен начин му оддадоа почит за неговата 89-та годишнина од раѓањето.
„Па јас така би рекол дека нашата прва мисија беше да продолжиме на Пирејот да му тураме вода и тој да биде уште поснажен. Секако тука би се надоврзал на идејата на Черчил дека не треба да се заборава минатото за да одиме напред. Ние тоа го правиме секојдневно со нашето семејство, тука се веќе вклучени и нашите деца кои морам да ги истакнам, Воскресија со дизајнирањето на сите наши активности, додека и синот кој работи надвор од нашите граници е активен член на Арт Поинт – Гумно. Ова што го гледате околу вас, фотографиите, тоа е една меморија што јас го носам во себе уште од најмали нозе“.
Неговата сопруга Ирена Андреевски ја отвори изложбата и објасни дека тоа претставува една убавина уловена пред да исчезне, низ сликите и уметничките дела од над 80 уметници кои ги посетиле и твореле во изминативе 20 години.
„Изложбата на американскиот фотограф ја улови суштината не само на Слоештица, туку воопшто на македонското село. Романтично, егзотично, топло и заборавено“.
