Во Вселенската патријаршија во Истанбул, вселенскиот патријарх г. Вартоломеј и архиепископот охридски г. Стефан заеднички ја одржаа првата Патријаршиска и синодална света литургија по примањето на Охридската Архиепископија во богослужбено и канонско единство со останатите православни цркви, со што се отстрани повеќедецениската шизма наложена врз нашата Црква.
Сослужувањето на патријархот Вартоломеј и архиепископот Стефан во соборниот храм „Свети Георгиј Победоносец“ во Фанар, Истанбул се одвиваше и на македонски јазик, што претставува голем историски момент.
Во беседата што ја одржа на крајот на Синодалната и Патријаршиската литургија, Вселенскиот Патријарх Вартоломеј, се обрати кон граѓаните и кон делегацијата на Владата на Македонија, предводена од премиерот Ковачевски, и ја нагласи големината на дарот за верниот народ на празникот Педесетница со кој црквата во нашата земја станува еднаква со сите други во православниот свет.
Веруваме дека овој настан значи потполно разбирање од ваша страна за големината на дарот на Мајката Црква кон вашиот народ, но и за одговорноста која ја понесувате, влегувајќи од денес во Сеправославниот Свет. Огноосветлени од благодатта на Утешителот, Го молиме, Го умолуваме и просиме од животворниот Свет Дух, обновителниот и сесилниот, слаткиот и Кој ги лекува раните, Кој ги надополнува човечките недостатоци, Кој ги испитува нашите срца – да ве утврди во вистината, да ве умножи во верата, да ве умудрува во борбата за Црквата, та и ние, вашиот заеднички отец и застапник, првиот и последниот помеѓу Епископите на Источната Света Христова Црква, да можеме духовно да се радуваме за вас и за вашите дела; та во нив да се прослави сечесното и великолепно име на Отецот и Синот и Светиот Дух, постојано, сега и секогаш и во вечни векови. Амин – рече во беседата патријархот Вартоломеј.
-Упорно ќе работиме и трпеливо ќе го чекаме тоа благопријатно време кога треба да се случи уредувањето на овие работи. Но ве молиме не заборавјте нѐ и помагајте ни да растеме. При вас се принадлежностите и правата и имаме полна доверба во вас, рече во својата беседа архиепископот Стефан.
На денешната заедничка литургија, му претходеше предавањето на Патријаршискиот и Синодален акт за прием на Македонската Православна Црква – Охридска Архиепископија во богослужбено и канонско единство со останатите православни цркви.
На крајот од петчасовната заедничката литургија меѓу Вселенската патријаршија и Македонската православна црква отелотворена во Охридската архиепископија, Патријархот г. Вартоломеј и Архиепископот г. Стефан се прегрнаа.
Одлуката на патријархот Вартоломеј и на Вселенската патријаршија е историски настан со кој конечно се стави крај на речиси седумдесетгодишната изолација на возобновената Охридска Архиепископија во лицето на Македонската Православна Црква.
