ОУ „Ѓорѓи Сугарев“ од Битола е прогласено за пријателско место за аутизам!
На 11. 05. 2022 во Музејот на македонската борба во Скопје се одржа промоција на проектот за AFS (Autism Friendly Spaces) под раководство на Македонското Научно Здружение за Аутизам (МНЗА), а поддржано од ЕРАЗМУС програмата на ЕУ, каде што беа доделени награди и сертификати на одредени лица и институции кои се пријателски расположени и прилагодени кон лицата со посебни потреби.
Сертификати добија училишта од Македонија и надвор од неа, стоматолошка ординација, ресторан и други институции. Токму едно од тие училишта е и ОУ „Ѓорѓи Сугарев“.
„Изминативе неколку месеци во соработка со Македонското научно здружение за аутизам, во нашето училиште успешно се спроведоа низа активности,се подигна социјалната свест и се прилагоди просторот за полесно функционирање на лицата со аутизам.Како резултат на тоа ООУ “Ѓорги Сугарев” е меѓу првите училишта кое се најде на мапата на Autism friendly spaces во Европа. Концептот „Пријателски места за аутизам“ е создаден за да одговори на потребите на лицата од спектарот на аутизам. Тој е од областа на социјалната инклузија, има за цел да обезбеди поголема пристапност за лицата и децата со аутизам во општеството“, велат од училиштето.
Проектот е финансиран од Еразмус плус програмата на ЕУ и истиот го спроведуваме заедно со асоцијацијата „Призми“ од Малта, две други институции од Малта, Аутизам Европа од Брисел и здружението Леарнинг Десигнерс од Шпанија.
