Денес во кристалната сала на КИЦ – Офицерски дом во Битола беше отворена изложбата „Македонија памети, никогаш да не се повтори!”
Изложбата ја изготвија Државниот архив и Институтот за национална историја во соработка со Државниот архив на Македонија – одделение Битола. Директорот на Архивот во Битола Гоце Стојановски ги претстави 19-те паноа со над 100 фотографии.
Оваа изложба беше дел од комеморативните настани по повод 80 годишнината од депортацијата на македонските Eвреи во концентрационите логори за време на втората светска војна, поточно на 11-ти март во 1943 г. од страна на бугарските окупатори и фашистички сојузници.
“Изложбата дава една ретроспектива на настаните пред воениот период и за време на воениот период. Тоа е една сеопфатна анализа на настаните кои се случувале тој 11-ти март како еден од најцрните денови во поновата македонска историја или најцрниот ден на изминатиот век. Изложбата со посебно задоволство ја отворам во Битола, бидејќи денес прославуваме 69 годишнина од постоењето на Битолскиот архив. За јавноста ќе биде отворена до 31-ви мај. Фокус група за оваа изложба ни се основците и средношколците, еве и еден апел за професорите по историја да обрнат поголемо внимание и да дојдат да ја погледнат оваа изложба” -изјави директорот на Државниот архив во Битола, Гоце Стојановски.
