Споменот на Гоце Талевски ќе продолжи да живее преку неговиот син Павел кој продолжи да чекори по патот на неговиот татко. Младиот живот на Гоце, тапанар во познатата битолска група „Оскар“ за жал, минатата година во мај згасна како последица на коронавирусот. Но, неговиот син, го продолжи неговото дело, воден од неговите совети.
Павел Талевски, кој е средношколец и наскоро ќе полни 16 години, заврши Нижо музичко училиште, отсек ударни инструменти. Тапани свири откако знае за себе – неговиот татко Гоце му беше главниот учител и водич, а сега главна инспирација и сила да продолжи по неговиот пат, со голема поддршка од неговото семејство.
Токму затоа, Павел на 16 април организираше отворен час по тапани во Битола во чест на неговиот татко, Гоце Талевски. Настанот беше помогнат од група Оскар, кафетерија Зрно и занаетчија Вера Попчановска.
