На Правниот факултет Битола денеска се одржа меѓународен хибриден научен и стручен собир посветен на „Третманот на осудените лица: Како до успешна ресоцијализација низ искуството на различни пенитенцијарни системи“.
Во онлајн обраќање, министерот за правда Никола Тупанчески истакна дека наставниот предмет Пенологија треба да биде застапен како посебен наставен предмет на Правните факултет во земјава и тоа позитивно ќе влијае врз подобрување на пенитенцијарниот систем.
– Клучни проблеми со кои се соочува пенитенцијарниот систем се пренатрупаност или пренаселеност на казнено-поправните установи, несоодветна кадровска екипираност, проблемот на ранливи категории на затвореници, несоодветни услови во казнено-поправните установи, несоодветна здравствена заштита на затворениците, несоодветен третман на затворениците во насока на остварување на процесот на ресоцијализација, корупција и лош однос на затворскиот персонал….тоа се дел од генералните забелешки кои се констатирани од меѓународниот фактор, рече Тупанчески.
Според него, нужна е потребата за обезбедување човечки ресурси и техничко материјално предуслови за непречено функционирање на казнено поправните установи во земјава, а со цел да се остварат правата на лицата лишени од слобода.
На собирот учествуваа истакнати универзитетски професори од САД, Финска, Естонија и соседна Србија кои споделија свои искуства.
Експертите велат дека со ресоцијализацијата на осудениците се рушат и стереотипите кои постојат кај нас за овие лица.
