Новинарката Маја Богоевска е годинешниов добитник на престижната награда за новинарство „Тоде Петревски“ која ја доделува „Битолски весник“ во чест на едно од најзвучните и најдостоинствени имиња на македонската новинарска сцена токму битолчанецот Тоде Петревски кој имаше импозантна новинарска кариера од светски калибар.
Богоевска истакна дека време е да се врати достоинството на професијата за да се каже: новинар – колку гордо тоа звучи.
–Голема е честа за мене што ја добивам наградата која го слави името и делото на доајенот на битолското и македонското новинарство, Тоде Петревски, синоним за храброст, пример како треба еден новинар да се бори за вистината. Изразувам огромна благодарност до семејството на Тоде Петревски и нашиот хроничар „Битолски весник“. Оваа награда ја чувствувам како залог да се борам, особено против полуписмените, кои го киднапираа новинарството и ја унаказија професијата новинар заради лични интереси. Да се борам во просторот каде манипулацијата со вистината е огромна – интернетот. Затоа знаењето и искуството кое сум го стекнала овие две децении, ревносно и несебично го пренесувам и ќе го пренесувам на младите генерации – истакна новинарката Богоевска. Во моментов, Богоевска е главен и одговорен уредник на веб порталот Читај бе. Таа зад себе има дваесетгодишна богата новинарска кариера, а истовремено е и обучувач на млади новинарски кадри и постојано е во тек со современите светски новинарски текови, кои наголемо се глобализираат.