Претставата „Далеку, а сосем тука“ е авторски проект на средношколците од гимназијата „Јосип Броз Тито“ која премиерно се одигра на летната сцена на Тумбе кафе.
„Далеку, а сосем тука“ е претстава која низ митолошкото и политичкото минато ќе ве поведе во нашата неизвесна сегашност за да ви пренесе дека секоја пречка во животот е минлива и менлива.
На сцената испреплетени одекнуваат страдањата на жените од војни и насилство, неправдите нанесени врз праведниците низ историјата, болката и љубовта на мајката за своето чедо, доаѓањето на новата мисла, потребата за промена, смената на поредокот и за крај, сенката на несигурната иднина која демне врз сите.
Гимназијалците оваа претстава ја изведоа под менторство на професорката по класични јазици од Горната Гимназија: Софија Бејковска. Целата подготовка на претставата траеше околу седум месеци.
Фотограф: Саше Богоевски
