Репортажа на Љубица Петковска
Нирнберг е најдобро чуваната тајна на Германија. Вториот најголем град во Баварија со над 500.000 жители. Големите ѕидини во стариот град се сведоци на многубројните историски и политички одлуки вклучувајќи и одземањето на германското државјанство на Евреите, а токму оваа одлука е главна причина за бомбардирањето на градот, кој бил срушен до темел.
Единствената градба која останала да сведочи на овој настан е Нирнбершкиот замок.
Сите главни атракции се сместени во стариот град, распослан на бреговите на реката Пегниц. Најдобриот начин да го истражите овој „бајковит“ и историски град е пешачка тура, но овој пат ние ве водиме низ главните атракции на божиќниот маркет на Нирнберг.
Кога би доаѓале во овој атрактивен германски град, а тоа да не е за Божиќ, можете да ги погледнете: Кралскиот замок и „Хајлиг гајст шпитал”. Градот е познат и по своите пазари на отворено кои нудат од сé по нешто како и: овошје, храна па сé до стари антиквитети.
На нашето видео ќе го погледнете – Божиќниот маркет „Нирнбергер Кристкинделмаркт”. Секоја година традиционално од 25 ноември до 24 декември во срцето на стариот град се одржува Божиќен Маркет кој датира од 1628 година.
Овој традиционален маркет е вториот по посетеност настан по светски познатиот Фестивал на пивото – Октоберфест во Минхен.
Секоја година се поставуваат над 160 божиќни куќички со карактеристичен црвено-бел покрив. Во состав на Нирнбершкиот божиќен маркет се наоѓа дел посветен на градовите со кои е Нирнберг „збратимен” а тоа се точно 20 градови од целиот свет, а меѓу нив е и нашиот главен на Македонија, Скопје.
Заштитен знак на божиќниот маркет е златниот ангел направен од фолија кој првенствено се подарувал на децата како подарок за Божиќ.
Најголемиот украс кој го краси божиќниот маркет е женската црква уште позната како црквата на нашата дама – Богородица која датира од 1352 година.
Низ улиците на божиќниот маркет ќе ја почувствувате мешавината на традиционалниот Нирнбергер и мирисот на греано вино или далеку познатото – Глувајн.
Традиционалниот „Нирнбергер” е домашен рецепт за колбаси направени од свинско месо, печени на букови дрва и тоа секоја година подготвени од локалните касапи по оригинални рецепти. Чаша греано вино – вкус кој е единствен и препознатлив за германските божиќни маркети е и главниот пијалок на милионските посетители кои го одбрале токму Нирнберг како нивна Божиќна дестинација.
