Преку трипартитна соработка меѓу АД ЕСМ, ЕСМ Молика ДООЕЛ Битола и Општина Новаци, 150 ученици од прво до деветто одделение од ЦОУ „Славко Лумбарковски“ – Новаци добиваат можност за дводневен престој на чист воздух во прекрасниот амбиент на Хотел „Молика“ на Пелистер.
Оваа заедничка иницијатива носи повеќекратни придобивки – децата да се дружат, учат и творат во природа, родителите да здивнат од секојдневните обврски, а Пелистер да одекнува од детска радост и смеа.
Со цел поттикнување на здравјето и психофизичкиот развој на учениците, директорот на Термоелектраните при РЕК Битола, Никола Кузмановски, истакна дека е чест што се продолжува оваа долгогодишна практика.
„Како општествено одговорна компанија, АД ЕСМ, во чии рамки функционираат РЕК Битола и Хотел „Молика“, секогаш се труди да биде двигател на заедницата и поддршка во различни области од секојдневниот живот. Свесни за предизвиците, ја препознаваме потребата фокусот да го ставиме на младите генерации, нивното здравје, образование, дружење и градење вистински вредности“, рече Кузмановски.
Градоначалникот на Општина Новаци, Стевче Стевановски, денес ја пречека првата група од 75 ученици и им посака незаборавен престој исполнет со убави спомени. Оваа активност е уште еден доказ за успешната и континуирана соработка меѓу општината и АД ЕСМ во интерес на локалната заедница.
Втората група од 75 ученици со нетрпение го очекува своето заминување кон Пелистер оваа среда.
