Со помош на кран, концертниот клавир Bösendorfer, денеска од просториите на Завод и Музеј Битола беше пренесен и поставен во концертната сала на Офицерскиот дом во Битола. На овој начин, една од најакустичните концертни сали во регионот, повторно оживува и ја добива својата вистинска функција.
Овој концертен клавир е донација од страна на Трифун Костовски за градот Битола за потребите на Фестивалот на класична музика „Интерфест“.
Постапката на пренесување на клавирот, кој тежи половина тон, но е и многу вреден, ја вршеа ангажирани професионалци се со цел клавирот неоштетен да може да биде поставен во салата. Ова беше единствениот начин за внесување, бидејќи скалите кои водат до салата се тесни и кружни, објасни Лили Бошевска, директор на ЈОУ КИЦ Битола.
Со овој чин концертната сала при Офицерскиот дом на ЈОУ КИЦ- Битола, прераснува во еден од најекслузивните концертни сцени за класична музика во регионот и отвора нови можности за презентирање на музичката култура од земјава и странство, истакна Бошевска.
Љубителите на класичната музика, со нетрпение го очекуваат годинешното издание на Интернационалниот фестивал на класична музика „Интерфест“, а одржувањето на фестивалот во овој објект беше дамнешна желба на организаторите на фестивалот Милица и Кирил Рибарски.
