Детско ликовно студио „Свети Кирил и Методиј” Битола денеска по 31-ви пат ја организира изложба по повод 8-ми Септември, Денот на независноста на Македонија.
Денеска во периодот од 10 до 13 часот околу 20 дела беа поставени на плоштадот „Магнолија” во Битола на тема староградска архитектура.
Творбите се работени од млади уметници од цел свет кои учествувале на над 40 колонии на „Малиот Битолски Монмартр”.
„Колку што има години нашата држава, толку е стара и оваа изложба. После 30 годни Министерството за образование го прекина финансирањето на ДЛС “Свети Кирил и Методиј“ Битола при што најавено е од страна на министерот дека во понеделник ќе се произнесат за нашиот статус, дали негативен или позитивен одговор. Без разлика на тоа, иако нашето мислење е дека ние припаѓаме каде што бевме, на крајот од овој месец патувам во Бугарија каде ќе имам средба со челниците од УНЕСКО каде ќе поднесеме поголема пријава, а на почетокот на октомври патуваме во Португалија на сестринска колонија каде ќе се соберат светските лидери од детсото сликарство за да формираме меѓународен борд на директори на брендот Мал битолски монмартр“, изјави Славчо Неделковски, претседател на Управен одбор на ДЛС „Свети Кирил и Методиј“ Битола.
